100 فرصة علشان اسيب مصر ولا عمري سبتها

ميت ألف فرصه عشان أسيب مصر ولا عمري سبتها
علشان هى بلدي اللي بجد بحبها
بحبها بكدبها وصدقها

بحب فيها أصالة وندالة أهلها
بحب فيها السهر بحب زيفها وأصلها

بحب فيها الشمس طلعه تنور وشها
بحب فيها القمر طالع يغازل حسنها
بحب فيها المشي علي شط نيلها وبحرها

بحب فيها بناتها راسمين ملامح شعبها
دي بنت مايصه وحاطه ورده فـ شعرها
ودي بنت جد ونازله جري لشغلها

هتلاقي فين بلد فيها الكنايس والجوامع بتحضن بعضها
مسلم مسيحي إخوات راضعين طيبة من صدرها
ويناموا حاضنين أرضها
هتلاقي فين تاني بلد كل حاجه فيها تخليك تحبها

هتقولي ظالمه هقولك برضو بحبها
هتقولي ضالمه مهو ده سواد شعرها
هتقولي زحمه هقولك علشان بنعشق أرضها
هتقو لي فيها فساد هقولك ده من طيبه شعبها

جرب كده تسهر ولو وحدك علي ضف نيلها وحبها
جرب تشوف بنت حلوه مع شاب واقف جنبها
بيحبها رغم انه شايل في قلبه هموم الدنيا كلها
جرب كده تاكل دره وترمس علي شطها
وتشوف وشوش الناس وإضحك زيها
طب وإنت ماشي لوحدك ووقعت في مشكله
مش بتلاقي ألف واحد جـنـبك بيحلها
لا تعرفهم ولا يعرفوك بس جمعكم حبها

اهي هي دي مصر زاحمه ظالمه فاسده ضالمه
مش مهم ده كفايه خفت دمها
هأفضل لمصر أقول وأعيد أنا أصلي عاشق أرضها